أنا حُـــر

Tuesday, August 29, 2006

رباعيات وخماسيات وسداسيات الحصاد





*
بلاش الحلم قدامك وقدامى يبات مجروح
بشد خطوة ترحالى وشباكك مازال مفتوح
تقابلينى بدمعة ووردة دبلانة
يسكت كلامى ما اقدر ابوح


*
على اى اساس
ممكن تتقاس
كل الاحداث
ازاى بتدور
وف اى ظروف
نحسب ونشوف
كده ع المكشوف
ونغضب ونثور


*
بحب البسمة لو كانت ف عز الحزن
واحب الضمة لو كانت ف اقرب حضن
واحبك لما تبتسمى وتنتصرى
بلاقى الحزن ضعيف واهن كبير ف السن


*
يا لابسى القراطيس ف الاعياد
وزافين عروسة لعريس ف البلاد
معقول مستنيين جيل قادر ع الاحلام
ومقطعين الاحلام ف كراريس الولاد


*
حسن شحاتة
اكل شكولاتة
وخلى الفرقة
ع البلاطة
لا هجوم نافع
والنص شوارع
حتى المُدافع
ساقط رياضة


*
بحبك قد احزانى
يا ريشتى وكل ألوانى
صبرى على التكشيرة
منايا ساعة الحيرة
اسمى ورسمى وعنوانى

*
حاصر ف حلم يكون على مقاسَكَ
تقدر تسابقُه على قد أنفاسَكَ
تقدر تكون سيدُه وتاج راسُه
يقدر يكون الأمل لو حلم تانى داسَكَ


*
ضاع منا ارواح بصاروخ ولا دبابة
ضاع منا اعراض بمخالب ومكر الديابة
داست علينا جزم زبالة الامم
دا عشان مازلنا غلابة


*
الروح دى طلعت شريفة
لا محتاجه تطلع من عمر مكرم
ولا محتاجه تشريفة
الروح دى اكرم
من ان يمشى ف جنازتها
ايادى مش نضيفة


*
هحبك كام مرة ف العمر
وحبك يساوى كام عمر
خايف لا تحبينى ولا تراضينى
مهما يطول بى العمر


*
زعيمنا اصبح دراكولا
بحكومة قوانينها حُولَه
أما المعارضة الكريمة
وافقة تشرب ف كاكولا


*
يا حكومة بتشرب كوكاكولا
ريسنا خلاص بقى دراكولا
حاكم البلد دى تبع اهله
وميراثه من اجداده الأولى


*
انك تلمس فيا شرودى رغم وجودى
وانك تغضب لما بقولك مش راح اكتب
ولا راح تانى تسمع صوتى
يبقى حقيقى لما اقولك امشى وسيبنى
اوعاك تمشى
بس سامحنى المرة دى


*
الشمس راحت والقمر مش عايز يبان
والكوبرى نوره مقطوع
تتصور حاسس بشىء من قلبى مخلوع
حاسس مشاعر راحت واحلام ناحت
حاسس بالحلم اللى كان عايز يتمرد
اصبح سكين مستكين ساكت
ياعم النيل
يا نيل
انا ممكن اوصل لفين ؟؟


*
تسكت وتسكت تطاطى راسك تحت روسهم
تغضب ما تغضب وترجع تانى تآمنهم
تلاقى نفسك بتعيط ويا الغلابة
المرصوصين ف صوان مشرحة زينهم


*
مسجون سجن انفرادى
من غير محكمة ولا قاضى
عليا كام سجان
ومعايا كام انسان
بيدورولهم على قواضى


*
السجن للغلبان
يمكن تكون أمه دعياله
وياخد إعدام
أما القادة والزعماء
ملهمش امهات تدعيلهم
بحسن الختام


*
دوس ع الحزن ودوس
خد ف الفرح دروس
دمعك مش هيفيدك
ولا فرحك بفلوس


*
يا منصورة يا اجمل حلم
بحسك ليا اب وأم
بحسك حالة مالها زى
حبيبة من لحم ودم


*
يا منصورة يا عروس النيل
الف وادور وانتى السبيل
وازاى ياخدنى عشق لغيرك
وانتى اللى عشقك سلسبيل


*
بتقولى فرحك هيكون عليا
وان الظروف ليكى خاضعة
خايف ابقى ضيف يوم الفرح
جاى يشرب حاجه ساقعة


*
مات اللى مات ف القطر واترص ع القضبان
مات اللى مات وف سطر اسمه ف الجرنان
مات اللى مات هيعوضوا اهله بقرشين
شوف تساوى كام جنية والاسم انسان


*
يا مصر
هنموت كام مرة ف العمر
ف حياة لا بتسر
وطيارة مضروبة بالأمر
وعبارة بلعها البحر
ولا ف حادثة قطر


*
يا مكسورين جوه الحياة
ف طريق طويل
ماتعرفوش لفين مداه
هى الحياة بتعلمنا البكا
ولا الاحلام تملى
مشبوكة بضل الآآه


*
كل ما أنام أحلم
بيوم نخرج عن السكات
وكل ما أنام أحلم
بثورة والظالم مات
أصحى من حلمى وأقول
حلم ف زمن خلصت فيه المعجزات

*
الحبر واخد من دمكم المداد
يا ارواح راحت من غير معاد
ماتت فى الجرى ورا قوتها والنهاية
هنقف قبل الماتش دقيقة حداد