حاجات مفقودة بينى وبينك
أنا عيدك
وتنهيدك
وأنا الوردة .. لما تلمس إيدك
والمفروض لما اشوفك اخبى واكتب جوه منى كلامك من غير ما اقوله .. والمفروض برضه لما اشوفك اغنى غنوتى اللى كتبتها عشانك بس اغنيها لنفسى .. والمفروض انى لما اشوفك اخاف اسلم عليكى احسن يبان من حبى من رعشة ايديا فى ايديكى .. والمفروض لما اشوفك اطلب لك كابتشينو من غير ما اقولك انى بعشق الكابتشينو .. والمفروض لما اشوفك عينى ماتجيش ف عينك من ضعفها .. المفروض ايه كمان لما اشوفك ؟؟!
أنا دراعك
وشراعك
وأنا ف غربتك .. بيتك
والحلم يكون ازاى لو يوم من غيرك .. ويكون ازاى لو مش ليكى وعشانك .. ولو وردتى ماقالتش .. مين اللى هيقول .. مستحيل انا اكيد ,,
أنا الدايب ف أوصافك
وأنا المركب على ضفافك
حلى الحمول عن كتافك
وخلينى ..
جواب فرحة ف بريدك
كان مفروض تلمسى فيا المعانى .. وتحسى سكوت حلمى قدامك وجنون فكرتى بجد لما بقولك - وبكل جد - ماتسيبك م الكعب العالى وتيجى نجرى .. وتسيبك م الشنطة اللى مقيدة كل ما فيكى وناخد النسيم بالاحضان .. وتسيبك من لخمتك وانتى بتعدلى الايشارب وتبصى لفوق .. فوق قوى .. ابعد شوية .. يمكن نلاقى النجمة اللى فوق مكتوب عليها اسمى واسمك .. يمكن تبصى فى كفك تلاقى صورتى بتبتسملك .. هو احنا ليه متقيدين من غير قيود ؟؟!
أنا أشوقك
وأوراقك
وأنا لحياتك .. ترياقك
آآآآه .. انا كل يوم حلمى يتمرد شوية ويتمنى غير حلمى حلم جديد ومش بعيد يحاول يشيلك من كيان حلمى .. وتملى بيكون خسران .. ومش بعيد احاول اكتب مليون قصيدة هجاء فى حبك .. وف ملامحك اللى دايب فيها اللى يمكن اكتب فيها اسوأ وصف وارسم لها اسوأ لوحة .. ومش بعيد اكتب فيكى أسوأ ما كتبت فى حياتى .. لكنى الاكيد فى النهاية - دايما - بكسر القلم واقطع الورق واقطف وردة - زى كل يوم - واديهالك وانتى رايحة الشغل الصبح .
posted by Tamer @ 6:13 PM
5 تعÙÙÙات:
كلام حلو جداااااااااا ومعبر اوى
الف شكر يا بوسى على كلامك
فينك مش باينه ليه ؟؟
المرة دى حلوة بس يا ريت ترد علينا زى ما رديت على بوسى
مساء الخيـــــــــــــــر
maalawady
ازيك يا كابتن
رديت عليك اهو :d
فيونكة حمرا
منورة
شقلوطة
اسم عجيب بس حلو
الف شكر يا ريناد على مرورك وانك عديتى هنا
وعقبال اما اشوفك منتشرة فى النت كله :d
يومكم بيضحك ان شاء الله
تامر ,,
Post a Comment
<< Home