فستان وطرحة .. وبدلة فرح
فستان وطرحة
نفسك فيهم
وانا فى انتظار
بدلة فرح
عينيكى سارحة
تدوّر عليهم
وانا لسه فرحى
لم طرح
!!
- تخيلى ممكن يكون النهاردة مش ف صالحنا
- يا ساتر .. وانت تعرف منين
- مجرد حلم
- ماتصدقوش .. دا كابوس
- مش عارف .
يغمض عيناه ويسرح بتفكيره .. تناديه مرة ولا يرد .. تلاحظ عدم وعيه لها .. تتركه يستكمل خياله .. يعبث بجيبه .. يخرج ورقة صغيرة . يمزقها
فستان وطرحة
وانا اللى عاجز
عن انى اجيبلك
حتى وردة
- ورقة ايه دى
- عنوان شقة جديدة
- وبتقطعها " تقولها فى غضب "
- الشقق موجودة .. فين الفلوس
يستكمل احلامه .. يعرف انه اغضبها كثيراً .. يؤنب نفسه على اصراره على عدم معرفتها بأمر الورقة .. احساس غريب يجتاحه .. ينظر اليها ليجدها مازالت تحاول رسم اى شىء على اوراقها .
جوايا صرخة
ساكت وشايفك
بتدينى حضنك
لايديكى فاردة
كفوفك تاخد احلامى
- ها .. رسمتى ايه ؟
- مش عارفه
- طب كنتى عايزة ترسمى ايه
- كان نفسى ارسم بكرة
- عندك حق انك مش عارفه
" تعبنا كثيراً " .. يقولها لنفسه .. لا مشاكل .. لا حزن .. لا ضيق .. سوى مكان للزواج .
عارف سارحة
نفسك تتفك ضفايرك
وتخبى ف مشاعرى
مشاعرك
عارف .. انا اسف
كتيرة عليكى آلامى
- عايزه الفلوس ولا الشقة
- لا ده ولا ده
- ؟
- عايزاك انت !!
يشعر بالخجل .. ينظر فى الارض .. مازال نفس الاحساس الغريب يجتاح كيانه .. يحاول ان يهرب منه .. يدندن ببعض اشعاره
بتقربينى .. وتقربيلى
بتعيشينى حلم النهاردة
وانا اللى خايف
يوم تعرفى
احلامى مش قد كلامى
- كتبت ايه جديد ؟
- لسه
- امال بتدندن ايه ؟
- قصيدة مش عايزه تكمل
- سمعنى ..
يسكت .. يعرف انه احزنها اليوم بموضوع الورقة .. يرفض ان يضايقها مرة اخرى .. يدخل معها فى حوارات اخرى .. لا تنتبه لهذه الحوارات .. تطلب منه سماع القصيدة .. يرفض .. تطلب .. يرفض .. يسكت .. تسكت .. تدور بعيناها فى المكان .. بقايا الورقة الممزقة يطيرها الهواء .. تمسك باحداها .. تبكى
فستان وطرحة
احلام وبتعدى
كان نفسى اجيبلك كتير
ولا بيَدِى
- مالك ؟
- قطعت القصيدة ليه ؟
- قصيدة ايه ؟
- انا عارفه مفيش عنوان .. دى القصيدة
- عادى .. ياما بنقطع كتير " يحاول الضحك "
تستكمل البكاء .. تستكمل الحزن .. يبدأ فى كتابة قصيدة جديدة .
فستان وطرحة
وبدلة فرح
احلام كتيرة وبتعدى
والخطوة مش راضية تخطى
فستان وطرحة
وبدلة فرح
احلام كتيرة وبتعدى
احلام كتيرة مابتجيش
وبننجرح
!!
posted by Tamer @ 1:12 AM
4 تعÙÙÙات:
I like the way u introduce the feelings
the way u wrote them and the way u made me see the scene it was nice
Keep the good work
الف شكر يا سيمون على مرورك
ومعلش متأخر فى الرد كالعادة :)
وان شاء الله الجاى يكون أجمل
تحياتى
تامر ,,
You have a different style...
but still i can see in every post that it can be better...it's like if it's still incomplete or you have something more to say...
congratulations and keep on writing...
lovely
shame u dont come to the cultural workshop aany more
i loved the text and the poems in it
keep it up
Post a Comment
<< Home